Magnús Már verður spilandi aðstoðarþjálfari Fram

Magnús Már Lúðvíksson skrifaði í dag undir tveggja ára samning við Fram og verður spilandi aðstoðarþjálfari Fram í 1. deild karla í knattspyrnu, en þetta kemur fram í fréttatilkynningu frá félaginu.

Magnús Már er 33 ára gamall og hefur spilað með Val undanfarin ár en var þar áður á mála hjá KR, Þrótti og ÍBV.

Hann á að baki rúmlega 150 leiki í efstu deild, 50 leiki í 1. deild og 27 bikarleiki. Hann varð Íslands- og bikarmeistari með KR árið 2011.

Magnús Már er auk þess afar fjölhæfur leikmaður sem getur leyst flestar stöður á vellinum.

Hann spilaði alla leiki Vals í deild og bikar árin 2013 og 2014.