Materazzi: Zidane ætti ekki að þurfa þjálfararéttindi

Marco Materazzi, fyrrum landsliðsmaður Ítalíu, telur það fáránlegt að Zinedine Zidane hafi verið dæmdur í þriggja mánaða bann fyrir að þjálfa án tilskilinna réttinda.

Eitt frægasta atvik knattspyrnusögunnar er þegar Zidane skallaði Materazzi í bringuna í úrslitaleik Ítalíu og Frakklands á HM 2006. Zidane er í dag þjálfari varaliðs Real Madrid.

„Þegar maður er meistari eins og Zidane, Materazzi og nokkrir aðrir ætti maður ekki að þurfa réttindi til að þjálfa,“ sagði hann í sjónvarpsviðtali á Ítalíu. „Maður ætti ekki að þurfa réttindi þegar maður er með 25 ára leikmannaferil að baki.“