Ferðuðust til nítján landa á einum sólarhring og settu heimset

Þrír Norðmenn settu heimsmet þegar þeir þurftu eingöngu einn sólarhring að ferðast til nítján landa. Þeir Gunnar farfors, Tay-young Pak og Øystein Djupvik fóru þessa frægu ferð í síðasta mánuði; byrjuðu í Grikklandi og enduðu í Liechtenstein.

Þeir höfðu viðkomu í Makedóníu, Búlgaríu, Kósóvó, Serbíu, Króatíu, Bosníu, Slóveníu, Austurríki, Ungverjalandi, Slóvakíu, Tékklandi, Þýskalandi, Hollandi, Belgíu, Lúxemborg, Frakklandi og Sviss. Þeir ferðuðust að mestu í bílaleigubílum, en þurftu tvisvar að stíga upp í flugvél. Þeir flugu frá Makedóníu til Serbíu og frá Austurríki til Þýskalands. 

Þeir settu sér þau skilyrði að stoppa í hverju landi og stíga þar niður fæti auk þess að taka myndir og myndbönd í öllum nítján löndunum sem þeir heimsóttu. Þeir telja að slæm veðurskilyrði hafi komið í veg fyrir að þeir hafi getað komist til Ítalíu. Þá hefðu löndin orðið tuttugu, en engu að síður bættu þeir fyrra heimsmetið sem var sautján lönd á sólarhring. Þeir áttu það met ásamt öðrum hópi. „Mér finnst ekki gaman að deila með öðrum. Að minnsta kosti ekki heimsmetum,“ skrifaði einn þremenninganna á bloggsíðu sína.

Veðmálafyrirtæki styrkti kappana í ferðalaginu og bauð almenningi að veðja hvort þeir næðu að klára.

Hér að neðan má sjá myndband frá ferðinni frægu.