Þrátt fyrir þrjú töp í fyrstu fjórum leikjunum undir stjórn Guus Hiddink hefur Robin van Persie, landsliðsfyrirliði Hollands, trú á þjálfaranum.
Ísland bar sigurorð af Hollandi í fyrsta sinn í gær og ljóst er að pressan minnkaði ekki á Hiddink við þau úrslit.
„Það er sárt að tapa hér,“ sagði van Persie eftir leikinn á Laugardalsvelli í gærkvöldi.
„Guus er frábær þjálfari. Við róum allir í sömu átt og gerum allt sem við getum til að spila vel,“ sagði van Persie ennfremur, en hann, líkt og fleiri leikmenn hollenska liðsins, náði sér ekki á strik í gær.
Holland er í 3. sæti A-riðils í undankeppni EM 2016 með þrjú stig eftir þrjá leiki. Ísland og Tékkland eru í tveimur efstu sætunum með fullt hús stiga eftir þrjár umferðir.
