Fylkir vann UMSK mótið

Fylkir tryggði sér sigur á UMSK móti kvenna í handknattleik með sigri á HK í dag, en leikurinn var síðasti leikur mótsins.

HK byrjaði betur og var 15-13 yfir í hálfleik, en í síðari hálfleik spýttu Fylkisstúlkur í lófana og unnu að lokum eins marks sigur, 24-23.

Fanney Þóra Þórsdóttir hélt áfram að spila vel í liði HK, en hún skoraði níu mörk í dag og samtals 26 í mótinu. Hún var markahæsti maður mótsins.

Sigrún Birna Arnardóttir var markahæst hjá Fylki með sjö mörk, en næst kom Patrícia Szölösi með fimm mörk. Szölösi var valinn leikmaður mótsins.

Fylkir vann eins og fyrr segir mótið með fjögur stig, FH var í öðru með tvö og HK rak lestina með ekkert stig.