Affallið er ein af litlu ánum þar sem veiði er haldið uppi með hafbeit og þrátt fyrir litlar smálaxagöngur víða um land hafa göngur í Affallið verið alveg prýðilegar.
Heildarveiðin úr ánni í gær stóð í 177 löxum og náði síðasta holl 17 löxum á land. Áin hefur breytt sér aðeins á milli ára þannig að einhverjir staðir sem gáfu laxa í fyrra halda laxi ekki þetta árið en í staðinn verða til nýjir staðir. Þetta er eitt af því sem getur gert veiðina þarna mjög skemmtilega því þeir sem detta niður á þessa nýju staði gera yfirleitt flotta veiði. Tíminn framundan hefur oft verið mjög gjöfull á þessu svæði og lúsugir laxar eru að veiðast allt til loka tímabils í október en þar að auki byrjar sjóbirtingurinn að ganga um þetta leiti og hann getur oft verið nokkuð vænn.
Veiðin í Þverá í Fljótshlíð hefur líka verið góð og lauk holl veiðum fyrir fáum dögum með 22 laxa og lax hefur sést víða í ánni en þó mest í og við sleppitjarnirnar en við efri tjörnina liggur oftar en ekki mikið af laxi.
177 laxar komnir úr Affallinu
