Ben Crane landaði sínum fimmta sigri á PGA-mótaröðinni í gær

Bandaríkjamaðurinn Ben Crane lék manna best á St. Jude Classic mótinu sem kláraðist í gær en þessi 38 ára kylfingur lék hringina fjóra á TPC Southwind vellinum í Memphis á tíu höggum undir pari. Í öðru sæti kom Troy Merritt á níu höggum undir pari en þeir Webb Simpson, Matt Every og Carl Petterson deildu þriðja sætinu á átta höggum undir.

Phil Mickelson endaði mótið jafn í 11.sæti á sex höggum undir pari en þessi vinsæli kylfingur hefur enn ekki náð að enda í topp tíu á móti á PGA-mótaröðinni í ár. Hann sýndi þó ágæta spretti um helgina og hver veit nema að hann verði í toppbaráttunni á US Open sem hefst næsta fimmtudag.

Ben Crane hefur leikið á PGA-mótaröðinni í 12 ár og er sigurinn hans fimmti á ferlinum. Hann er einnig þekktur fyrir að vera meðlimur í einu strákahljómsveitinni á mótaröðinni ásamt Bubba Watson, Rickie Fowler og Hunter Mahan en hún kallast „Golfstrákarnir“. Þeir gáfu út lag fyrir þremur árum sem hefur náð töluverðum vinsældum á Youtube en það má sjá hér.

Næsta mót er sjálft risamótið US Open en í ár fer það fram á Pinehurst og verður það að sjálfsögðu í beinni útsendingu á Golfstöðinni.