Pollapönkarar með þeim fyrstu á svið á laugardag

Hljómsveitin Pollapönk með lagið Enga fordóma, eða No Prejudice, komst í kvöld áfram í úrslitakeppni Eurovision ásamt Svíþjóð, Svartfjallalandi, Ungverjalandi, Rússlandi, Hollandi, Armeníu, Aserbaísjan, San Marinó og Úkraínu.

Eftir að úrslitin lágu fyrir héldu hljómsveitarmeðlimir rakleiðis á blaðamannafund þar sem þeir drógu um hvort þeir keppa í fyrri eða seinni helmingi úrslitakvöldsins. Drógu þeir upp borða með áletruninni "First Half" sem þýðir að Pollapönk stígur á svið með fyrstu keppendum á laugardagskvöldið. 

Endanleg röðun á úrslitakvöldinu kemur í ljós eftir seinna undanúrslitakvöldið á fimmtudag þar sem fimmtán þjóðir keppast um þau tíu pláss sem laus eru í úrslitunum.