Jordan Spieth og Bubba Watson efstir fyrir lokahringinn á Masters

Hinn tvítugi Jordan Spieth hefur heldur betur slegið í gegn á Mastersmótinu en fyrir lokahringinn deilir hann forystunni með Bubba Watson. Báðir kylfingar eru fimm höggum undir pari en Spieth hefur sýnt mikinn stöðugleika í leik sínum og leikið alla hringina í mótinu undir pari, þrátt fyrir að þetta sé fyrsta Mastersmótið sem hann tekur þátt í á ferlinum.

„Leikplanið mitt hefur alveg gengið upp,“ sagði Spieth í viðtali við fréttastofu Sky eftir hringinn í dag. „Að spila á Masters er draumur sem er nú þegar orðinn að veruleika, að vinna mótið er annar draumur út af fyrir sig, það yrði stórkostlegt.“

„Ég held að lykillinn að árangri hérna á Augusta sé að vera þolinmóður, völlurinn refsar og gefur til skiptis, maður verður bara að vera þolinmóður og passa að missa ekki móðinn þegar að slæmu höggunum er refsað.“

Bubba Watson spilaði frábært golf fyrstu tvo dagana og leiddi mótið eftir tvo hringi. Honum tókst þó ekki að fylgja því eftir á þriðja hring en hann kom inn á 74 höggum, tveimur yfir pari og er því toppbaráttan galopin fyrir lokahringinn.

Jafnir í þriðja sæti á fjórum höggum undir pari eru Matt Kuchar og Jonas Blixt en á eftir þeim á þremur höggum undir pari koma Rickie Fowler og Miguel Angel Jimenez. Jimenez rétt skreið í gegn um niðurskurðinn í gær en fór á kostum í dag og lék á 66 höggum eða sex undir pari.

Á morgun eru því ágætar líkur á að nýtt met verði sett þar sem Jordan Spieth gæti orðið yngsti kylfingurinn í sögunni til þess að sigra á Mastersmótinu. Á hinn bóginn gæti Miguel Angel Jimenez orðið elsti kylfingur sögunnar til þess að bera sigur úr býtum á risamóti í golfi.

Sigurvegari síðasta árs, Adam Scott, spilaði sig úr toppbaráttunni í dag eftir hring upp á 76 högg en hann er samtals á einu höggi yfir pari fyrir lokahringinn, jafn nokkrum öðrum kylfingum í 16. sæti.