Matt Every stal sigrinum á Bay Hill

Bandaríkjamaðurinn Matt Every sigraði á Arnold Palmer Invitational mótinu sem fram fór á Bay Hill vellinum og kláraðist í kvöld. Every hafði áður leikið í 93 mótum án þess að sigra en hann lék hringina fjóra á samtals 13 höggum undir pari. Lokahringur upp á 70 högg eða tvo undir pari tryggði honum sigur á þessu sögufræga móti en í öðru sæti kom Keegan Bradley á 12 undir.

Adam Scott á eflaust eftir að vilja gleyma lokahringnum sem fyrst en eftir að hafa leitt mótið frá fyrsta hring, þar sem hann setti glæsilegt vallarmet, gekk nánast ekkert upp hjá Ástralanum í dag. Hann kom inn á 76 höggum og endaði  að lokum í þriðja sæti á samtals 11 höggum undir pari.

Every var augljóslega í skýjunum eftir að hafa sigrað á sínu fyrsta móti á PGA-mótaröðinni.

„Það er mögnuð tilfinning að sigra loksins mót á meðal þeirra allra bestu,“ sagði Every í viðtali við fréttamenn eftir hringinn í dag. „Ég hreinlega trúi því ekki ennþá að ég hafi unnið, þetta er svo mikill heiður. Ég er aðeins þrítugur og enn að taka framförum, vonandi er þetta aðeins byrjunin hjá mér.“

Næsta mót á PGA-mótaröðinni, Valero Texas Open, fer fram á TPC San Antonio vellinum í Texas og hefst á fimmtudaginn.