Hvetja hestamenn að fara varlega á ísnum

Ísinn sem hefur verið á vegum borgarinnar undanfarnar vikur hefur verið að gera útreiðarfólki lífið leitt. Búið er að reyna að merja ísinn og salta hann en þar sem tíðarfar er heldur rysjótt þá dugar það í skamman tíma og þar sem þetta er töluvert kostnaðarsamt. Frá þessu er greint á heimasíðu Fáks.

Útlit er fyrir töluverða snjókomu á fimmtudaginn svo það verður ekkert gert að þessu sinni fyrir reiðvegina.

Ætlunin var að skoða söndun á helstu reiðleiðum en hefur verið ákveðið að bíða með það og sjá hvað gerist á fimmtudaginn og hvernig aðstæður verða eftir hann.

Þeir sem ríða út eru beðnir að fara varlega, bæði er hált og svo er kominn aðeins holklaki og geta hestar misstigið sig svo það er gott að fara varlega á meðan mesti ísinn er.