Patrekur: Naut þess ekki að horfa á Ísland spila í kvöld

Patrekur Jóhannesson, landsliðsþjálfari Austurríkis, var nokkuð léttur er blaðamaður Vísis hitti á hann eftir leikinn gegn Íslandi í kvöld. Hann sagði að sitt lið hefði einfaldlega tapað fyrir betra liði.

"Íslenska liðið spilaði vel og lét okkur líta illa út. Þeir voru mjög einbeittir og ég var búinn að vara mína menn við því. Það er stundum erfiðara að framkvæma þá hluti. Ísland var sterkara," sagði Patrekur en var mikil þreyta í hans liði?

"Það gæti verið. Ísland er með atvinnumenn og helmingurinn af mínu liði er áhugamenn þannig að það hefur sitt að segja."

Patrekur er eftir sem áður stoltur af sínu liði en það hefur staðið sig vel á EM. Hann er með marga menn í liðinu sem spila í Austurríki.

"Það er enginn úr Olís-deildinni hérna með Íslandi. Það eru allt atvinnumenn þar. Ég er með stráka sem eru að gera margt annað. Það er einn framkvæmdastjóri hjá okkur og svona. Menn eiga samt að hafa meira súrefni."

Ísland afgreiddi leikinn mjög snemma og Patrekur var eðlilega súr yfir því.

"Ég vissi nákvæmlega hvernig leikurinn myndi spilast. Ég hef horft á þetta í mörg ár. Ísland refsar og við verðum að vera tilbúnari en við vorum. Ég held að mínir menn hafi viljað en hafi einfaldlega ekki getað þetta. Ég tók smá rispu í hálfleik á strákana.

"Ég naut þess ekki að horfa á Ísland spila í dag en ég mun njóta þess það sem eftir lifir mótsins. Ísland er með frábært lið og liðið á eftir að bíta áfram frá sér. Þeir eiga að vinna Makedóna en gætu lent í vandræðum ef dómararnir leyfa þann göngubolta sem þeir vilja spila."