Búið að klína upp á Kjarval þjóðlegum gildum.

„Ég ætla að vinda ofan af goðsögninni Kjarval,“ segir Ólafur Gíslason listfræðingur, en hann og Klara Stephensen hjá Arion banka ræða við gesti um verk Kjarvals í tengslum við sýninguna Mynd af heild II: Kjarval bankanna í dag kl. 15 á Kjarvalsstöðum.

„Ég ætla að bregða nýju ljósi á Kjarval. Ég tel það til að mynda vera misskilning að Kjarval hafi verið boðberi þjóðlegra gilda,“ útskýrir Ólafur og segir Kjarval hafa verið fullkomlega í tengslum við nútímalega strauma í myndlist í hans samtíma sem allir voru gegn þjóðlegum gildum.

„Eftir nasisma hugsaði enginn um þjóðleg gildi sem einhver gildi í myndlist. Þessu er búið að klína upp á Kjarval og eyðileggja þannig fyrir hans verki. Það hefur hreinlega valdið misskilningi um framlag hans til íslenskrar myndlistar og menningar,“ bætir Ólafur við.

Á sýningunni gefst í fyrsta sinn tækifæri til að sjá öll verk Kjarvals í eigu íslensku bankanna á einum stað.

Ásamt Ólafi kemur Klara Stephensen til með að svara spurningum gesta.

„Ég verð þarna að tala um verkin, ef fólk hefur spurningar í sambandi við safneignina eða um bankana,“ segir Klara.

„Þetta er heljarinnar safn. Arion banki á til að mynda 17 verk eftir Kjarval sem eru á sýningunni,“ segir Klara jafnframt.