Hefur mikla þýðingu fyrir félagið að komast áfram

FH-ingar unnu frábæran 1-0 sigur á litháísku meisturunum í Ekranas í fyrstu umferð forkeppni Meistaradeildar Evrópu í gær en leikurinn fór fram í Litháen.

FH stendur því vel að vígi fyrir síðari leikinn sem fram fer á Kaplakrikavelli eftir viku.

Pétur Viðarsson skoraði eina mark leiksins eftir um hálftíma leik.

Skot heimamanna höfnuðu nokkrum sinnum í tréverkinu og þá sérstaklega í síðari hálfleiknum en Hafnfirðingarnir höfðu heppnina með sér og héldu markinu hreinu.

„Það er góð stemmning í hópnum hér í rútunni á leiðinni á hótelið okkar,“ sagði Heimir Guðjónsson, þjálfari FH, í samtali við Fréttablaðið eftir leikinn í gær.

„Við lögðum upp með að spila sterkan varnarleik og beita skyndisóknum og það gekk algjörlega eftir. Við náðum síðan að skora markið eftir fast leikatriði. Þeir [Ekranas] fengu sín færi í leiknum en mér fannst þeir aldrei ná einhverjum tökum á þessum leik. Eðlilega voru þeir meira með boltann en við vorum búnir að undirbúa okkur vel fyrir það.“

Ekranas hefur verið sigursælt lið í Litháen undanfarin ár.

„Þetta lið hefur orðið litháískur meistari síðastliðin fimm ár og er því mjög vel mannað. Því hefur aftur á móti ekki gengið sem skyldi í deildinni á þessu tímabili. Við erum auðvitað bara ánægðir með þennan sigur hjá okkur en við gerum okkur fyllilega grein fyrir því að síðari leikurinn er eftir heima.“

Það verður mikið undir eftir eina viku.

„Við förum nokkuð rólega inn í heimaleikinn og þurfum að nálgast hann af skynsemi. Það er gríðarlega mikilvægt fyrir knattspyrnudeild FH að fara áfram og við gerum okkur fyllilega grein fyrir því að það mun hafa mikla þýðingu fyrir félagið að komast áfram í þessu einvígi. Það mun þýða fjóra leiki til viðbótar í þessari deild.“