Real Madrid slapp með skrekkinn

Real Madrid er enn með í baráttunni á Spáni eftir nauman 2-3 sigur á Valencia í kvöld. Sigurmarkið var skrautlegt.

Angel di Maria kom Real yfir með frábæru marki eftir einstaklingsframtak. Piatti jafnaði skömmu síðar en Cristiano Ronaldo kom Real yfir fyrir hlé.

Jeremy Mathieu jafnaði metin með góðu skallamarki og Real gekk lítið í sókninni eftir það.

Þegar aðeins átta mínútur lifðu leiks skoraði varamaðurinn Jese Rodriguez sigurmarkið. Skot í teignum á nærstöng sem Guaita átti að verja frekar auðveldlega. Hann gætti ekki að sér og boltinn fór inn. Klaufalegt svo ekki sé meira sagt.

Real er fyrir vikið aðeins fimm stigum á eftir Barcelona og Atletico Madrid sem eru jöfn á toppnum.