Woods ósammála dómurum

Tiger Woods segir að það hafi verið röng ákvörðun hjá dómurum í BMW Championship mótinu að veita sér tvö högg í víti. Woods var dæmdur brotlegur þegar hann færði til laufblöð í kringum bolta sinn á 1. braut á föstudag sem varð til þess að bolti hans færðist örlítið. Woods fékk dæmt á sig tveggja högga víti fyrir að slá bolta sínum af röngum stað.

„Ég var mjög reiður því ég taldi ekkert hafa gerst. Að mínu mati þá titraði boltinn aðeins og ekkert meira en það. Dómararnir endursýndu atvikið aftur og aftur en ég var á sömu skoðun,“ sagði Woods við fjölmiðla eftir þriðja hring í gær. Woods lék á 66 höggum eða fimm höggum undir pari og er fjórum höggum á eftir Jim Furyk fyrir lokahringinn.

Woods var ekki sá eini sem hefur fengið dæmt á sig klaufalegt víti í mótinu. Eins og sjá má hér að neðan þá fékk Justin Rose dæmt á sig eitt högg í víti fyrir að slá grastorfu í boltann sinn úr æfingasveiflu sem varð til þess að boltinn færðist.