Spilar ekkert en heldur landsliðssætinu

Iker Casillas fær enn ekki tækifæri hjá Real Madrid en þrátt fyrir það þarf hann ekki að hafa neinar áhyggjur af stöðu sinni hjá spænska landsliðinu.

Landsliðsþjálfari Spánar, Vicente del Bosque, hefur fullvissað Casillas um að hann ætli ekki að hætta hann að velja hann í landsliðið þó svo hann sé ekki að spila.

Casillas var óvænt settur á bekkinn hjá Real Madrid í fyrra. Jose Mourinho ákvað að velja frekar Diego Lopez sem síðan fór á kostum.

Carlo Ancelotti er nú tekinn við Real og var fastlega búist við því að hann myndi henda Casillas aftur í markið. Það gerðist ekki því Lopez var í marki Real um síðustu helgi er spænski boltinn fór að rúlla.