Neymar skoraði sitt fyrsta mark fyrir Barcelona

Brasilíumaðurinn Neymar opnaði markareikning sinn hjá Barcelona í dag þegar liðið vann 7-1 stórsigur á úrvalsliði frá Tælandi í vináttuleik í Bangkok. Lionel Messi skoraði tvö mörk í leiknum.

Barcelona keypti Neymar á 49 milljónir punda frá Santos í sumar en hann hafði ekki náð að skora í fyrstu tveimur leikjum sínum með Börsungum. Neymar kom inn á sem varamaður í báðum þeim leikjum.

Neymar fékk að byrja þennan leik og var búinn að koma Barcelona í 1-0 strax á 11. mínútu. Hann var í framlínunni ásamt þeim Lionel Messi og Pedro.

Pedro skoraði þrennu í leiknum, Messi var með tvö mörk og Sílemaðurinn Alexis Sanchez skoraði síðan sjöunda og síðasta markið.