Anton og Hlynur dæma í undanúrslitum Meistaradeildar

Dómaraparið Anton Pálsson og Hlynur Leifsson verða í eldlínunni þann 1. júní í Köln þegar fjögur bestu lið Evrópu leiða saman hesta sína.

Anton og Hlynur munu dæma leik Kielce og Barcelona í undanúrslitum sem fram fer laugardaginn 1. júní. Um mikla viðurkenningu er að ræða fyrir íslenska dómaraparið sem hefur staðið sig vel á alþjóðavettvangi í langan tíma.

Hlynur ætlar að leggja flautuna á hilluna í lok leiktíðar og verður undanúrslitaleikurinn í Köln því síðasti leikurinn sem hann dæmir á alþjóðavettvangi. Anton mun dæma með Jónasi Elíassyni á næstu leiktíð.

Í hinum undanúrslitaleiknum mætast Kiel og Hamburg. Leikirnir verða í beinni útsendingu á Stöð 2 Sport.