Allt um hár í einni bók

Theodóra Mjöll Skúladóttir Jack miðlar visku sinni um hár og hárumhirðu í bókinni Hárið. Þar er að finna yfir 70 uppskriftir að hárgreiðslum en ljósmyndarinn Saga Sig sá um myndskreytingar.

Tíska „Mér fannst vanta almennilega bók sem kennir hárgreiðslur og hárumhirðu á markaðinn,“ segir Theodóra Mjöll Skúladóttir Jack, hárgreiðslukona og nemi í vöruhönnun í Listaháskóla Íslands, en hún á heiðurinn að bókinni Hárið sem er væntanleg í lok næstu viku.

Hárið inniheldur uppskriftir að yfir 70 hárgreiðslum, allt frá venjulegu tagli í árshátíðargreiðslur. Einnig er ýtarlegur kafli í byrjun bókarinnar þar sem öllum spurningum um hár og hárumhirðu er svarað.

Hugmyndin að bókinni spratt er Theodóra var að vinna sem hárgreiðslukona hjá Rauðhettu og Úlfinum. „Þegar ég var að vinna á stofunni eyddi ég alltaf miklum tíma í að svara spurningum kúnnanna minna varðandi hárumhirðu og kenndi þeim að flétta og krulla hárið. Þá fór ég að spá af hverju það væri ekki til bók þar sem öllum þessum spurningum væri svarað og gæfi einfaldar uppskriftir að flottum hárgreiðslum.“

Theodóra leggur áherslu á að allar uppskriftirnar í bókinni séu einfaldar og fyrir alla að leika eftir. „Ég eyddi miklum tíma í að einfalda hárgreiðslurnar svo að allir gætu skilið og prufað sig áfram. Svo er ég líka með nokkrar uppskriftir að barnahárgreiðslum fyrir foreldrana að læra.“

Theodóra fékk til liðs við sig ungt fagfólk við gerð bókarinnar. Ljósmyndarinn Saga Sig sá um að taka þær fimm hundruð myndir sem prýða bókina og förðunarmeistarinn Ísak Freyr Helgason mundaði penslana. Stúlkurnar hjá auglýsingastofunni Undralandið sáu svo um útlit og uppsetningu bókarinnar. „Ég var ekkert smá heppin með samstarfsfólk. Mig langaði að fá unga og efnilega listamenn til liðs við mig og gefa þeim um leið tækifæri til að láta ljós sitt skína.“

Theodóra segir bókina vera skyldueign á hvert heimili enda mikilvægt að hugsa vel um hárið sitt. „Ég vona að ég geti komið af stað vitundarvakningu varðandi hárumhirðu. Hár er svo stór partur af okkur og mikilvægt að hugsa vel um það.“