Lönduðu 122 löxum í Stóru-Laxá

Veiðiklúbburinn Sogsmenn lokaði svæði I og II í Stóru-Laxá um helgina með því að fá 47 laxa.

"Þá er árlegri veislu í Stóru Laxá l-ll lokið þetta árið," segir á vef Sogsmanna. "Við félagarnir vorum svo heppnir að vera með lokahollið sem stóð fyllilega undir væntingum. Alls komu 47 laxar á land hjá okkur sem veiddust mjög víða á svæðinu."

Stærsti laxinn um helgina mældist 100 sentímetra langur.

Þeir Sogsmenn hafa nú farið í þrjá túra í Stóru-Laxá á rúmri viku. Tvisvar hafa þeir veitt á svæði I og II og einu sinni á svæði IV. Í þessum ferðum hafa þeir samtals náð 122 löxum. Eins og áður sagði fengu þeir 47 laxa nú um helgina á svæði I og II, þá lönduðu þeir 61 laxi á svæði I og II fyrir rúmri viku og 14 löxum á svæði IV í síðustu viku eins og greint var frá á Veiðivísi á föstudaginn. Sannarlega góð veiði hjá þeim félögum.

trausti@frettabladid.is