Keilis-systkinin með tólf fugla saman í dag

Rúnar Arnórsson og Signý Arnórsdóttir systir hans voru í miklu fuglastuði á þriðja degi Íslandsmótsins í höggleik í dag. Rúnar fékk sjö fugla og Signý var með fimm fugla. Rúnar er í efsta sæti hjá körlunum en Signý er sjötta hjá konunum.

Rúnar fékk fimm fugla á fyrstu sjö holum dagsins og náði alls sjö fuglum á hringnum. Hann fékk fleiri fugla í dag (7) en á fyrstu tveimur hringunum (6). Rúnar lék holurnar átján á fjórum höggum undir pari og hefur því leikið tvo af þremur hringum mótsins á 66 höggum.

Signý lék hringinn á einu höggi yfir pari og sem var tíu höggum betri spilamennska hjá henni en í gær. Hún komst fyrir vikið upp í sjötta sætið en er engu að síður átta höggum á eftir Valdísi Þóru Jónsdóttur sem er í forystu. Signý fékk fimm fugla í dag en hafði "bara"fengið fjóra fugla samanlagt á fyrstu 36 holunum á mótinu.

Rúnar og Signý fengu bæði fugla á fyrstu, fimmtu og sjöundu holu en Rúnar var síðan með fugla á annarri, fjórðu, fjórtándu og sextándu en Signý vann síðan líka högg á tveimur síðustu holunum á hringnum.