Clarke á titil að verja en Tiger þykir líklegastur

Opna breska meistaramótið í golfi hefst í dag og að þessu sinni fer þetta stórmót fram á Royal Lytham & Annes vellinum á Englandi. Samkvæmt venju fer mótið fram á strandvelli eða "linksvelli" og er þetta í 141. skipti sem mótið fer fram.

Að venju verður bandaríski kylfingurinn Tiger Woods í kastljósinu en hann er næst sigursælasti kylfingur allra tíma þegar kemur að sigrum á stórmótum. Tiger hefur sigrað á 14 stórmótum en Jack Nicklaus á metið - alls 18 sigrar á stórmótum.

Stórmótin fjögur sem fram fara á hverju ári eru; The Masters, opna bandaríska meistaramótið, opna breska meistaramótið og PGA meistaramótið.

Aðstæður á Royal Lytham & Annes verða erfiðar. Alls eru 206 sandglompur á vellinum og búið er að breyta einni par holu í par 4, án þess að brautin hafi verið stytt. Par vallarins er því 70 en ekki 71 og upphafsholan er par 3, sem er ekki algengt.

Eftir gríðarlega úrkomu á vestur-strönd Englands í sumar er karginn utan brautar þéttur sem aldrei fyrr og Woods sagði eftir fyrsta æfingahringinn að það væri varla hægt að slá úr grasinu utan brautar á vissum stöðum á vellinum. Á móti kemur að brautirnar eru mýkri en áður og kylfingar ættu að ná að stöðva boltann þar sem þeir ætla sér að láta hann stoppa.

Darren Clarke hefur titil að verja á mótinu en Norður-Írinn kom flestum á óvart í fyrra þegar hann landaði sínum fyrsta sigri á stórmóti.

Tiger Woods hefur ekki sigrað á stórmóti frá árinu 2008 þegar hann stóð uppi sem sigurvegari á opna bandaríska meistaramótiu. Hann hefur þrívegis sigrað á opna breska meistaramótinu, 2000, 2005 og 2006.

Woods á góðar minningar frá þessum velli en hann lék á 66 höggum árið 1996 á öðrum keppnisdegi opna breska meistaramótsins og á þeim tíma var Wood enn áhugakylfingur. Hann endaði í 25. sæti þegar mótið fór fram á þessum velli árið 2001.

"Ég mun reyna að koma mér í aðstöðu tl þes að sigra, ég trúi því að ef ég kem mér nógu oft í slíka aðstöðu þá mun ég standa uppi sem sigurvegari á stórmóti á ný," sagði Woods við fréttamenn í gær þar sem hann var spurður að því hvort hann ætti eftir að landa sigri á stórmóti á ný. Woods hefur sýnt fína takta á þessu ári en hann hefur sigrað á þremur PGA mótum nú þegar eftir að hafa farið í gegnum tvö ár án sigurs.

Samkvæmt breskum veðbönkum eru mestar líkur á því að Tiger Woods landi sigrinum. Aðrir sem koma sterklega til greina eru; Lee Westwood (England), Padraig Harrington (Írland), Luke Donald (England), Rory McIlroy (Norður-Írland), Justin Rose (England), Graeme McDowell (Norður-Írland).