Fjórir laxar veiddust í kuldanum í kvöld

Fjórir laxar veiddust á seinni vaktinni í Blöndu í dag og komu þeir allir á milli klukkan átta og tíu í kvöld. Í morgun veiddust 4 laxar og í gær komu 10 á land. Alls hafa því veiðst 18 laxar fyrstu tvo dagana, sem verður að teljast mjög gott.

Þorsteinn Hafþórsson, sem er öllum hnútum kunnugur í Blöndu, segir að það hafi verið mjög kalt fyrir norðan í dag, aðeins um fjögurra stiga hiti. Hann segir að veiðimenn hafi séð þó nokkuð af fiski á Spítalanum, sem er veiðistaður rétt fyrir ofan veiðisvæði I.

Stefán Páll Ágústsson, hjá Lax-á, sagði Veiðivísi að stærsti laxinn á morgunvaktinni hefði verið 15 pund og veiðimenn hafi misst nokkra laxa.

Opnunarhollið lýkur veiði í fyrramálið eins og í Norðurá. Norðurá er því með 24 laxa fyrir síðustu vakt en Blanda 18.

trausti@frettabladid.is