Xavi: Leikmenn Real Madrid kunna ekki að tapa

Xavi Hernandez, miðjumaður Barcelona, talaði illa um leikmenn Real Madrid í nýjum myndbroti sem var tekið upp af Barca TV þegar Xavi hélt að hann væri ekki í mynd. El Mundo birti myndbandið á heimasíðu sinni.

Xavi Hernandez segir þar framkomu leikmanna Real verða ótrúlega og þeir kunni ekki að tapa. Hann talar einnig um að leikmenn spili eins og villidýr inn á vellinum og láti hann og félaga hans í Barcelona-liðinu finna mikið fyrir sér.

Orð Xavi Hernandez eru örugglega eins og olía á eldinn í stirðum samskiptum leikmanna Barcelona og Real Madrid en margir þeirra þurfa síðan að spila saman í spænska landsliðinu.

Real Madrid datt út fyrir Barcelona í spænska bikarnum í vikunni og hefur aðeins náð að vinna einn af síðustu fjórtán leikjum liðanna. Real Madrid er hinsvegar á góðri leið með að taka spænska meistaratitilinn af Börsungum.