Íslensk kort ekki verið misnotuð

Ekkert bendir enn til þess að íslensk greiðslukort hafi verið misnotuð eftir að persónuupplýsingum um Playstation 3 notendur sem keypt hafa vörur í gegnum netverslun var stolið í gegnum vef Sony. Alls eru um 77 milljónir notenda skráðar en ekki hefur verið upplýst hvort þjófnaðurinn náði til þeirra allra eða aðeins hluta.

„Við brýnum fyrir okkar korthöfum sem hafa verið að versla í gegnum þessar tölvur að fylgjast grannt með notkun á kortunum sínum,“ segir Kristján Harðarson hjá kortafyrirtækinu Valitor.

Hann segir að kortin hafi þegar verið sett á sérstakan gátlista hjá fyrirtækinu, en ekki hafi komið upp nein tilvik þar sem kortanúmerin hafa verið misnotuð. Komi misnotkun í ljós verði kortunum lokað og ný gefin út.

Vefversluninni var lokað í síðustu viku án skýringa, en Sony hefur nú upplýst að einhver eða einhverjir hafa nýtt sér galla á kerfi Sony og sótt skjal með upplýsingum um notendur. Í skjalinu voru nöfn, heimilisföng, netföng, símanúmer, viðskiptasaga, greiðslukortanúmer og aðrar viðkvæmar persónuupplýsingar.

Sony gæti þurft að greiða sekt fyrir að verja ekki persónuupplýsingarnar betur en raun bar vitni. Samkvæmt frétt BBC um málið hafa bresk stjórnvöld hafið rannsókn á því hvernig stendur á því að hægt var að nálgast þessar upplýsingar svo auðveldlega.

- bj