Verður hinn 41 árs gamli Karlsson nýliði ársins?

Robert Karlsson gæti orðið elsti nýliði ársins á PGA mótaröðinn í golfi en hinn 41 árs gamli kylfingur frá Svíþjóð ætlar að einbeita sér að PGA mótaröðinni á þessu ári. Karlsson hefur á undanförnum árum verið í fremstu röð á Evrópumótaröðinn en hann er fluttur með fjölskyldu sína til Norður-Karólínu og ætlar sér stóra hluti á nýjum „vinnustað".

Árið 2008 var Karlsson efstur á peningalistanum á Evrópumótaröðinni en hann segir að það hafi ekki verið hægt að bíða lengur með þessa ákvörðun.

„Ég vildi ekki ljúka ferlinum og segja við sjálfan mig að ég hefði átt að taka eitt tímabil sem fullgildur meðlimur á PGA mótaröðinni. Möguleikinn opnaðist fyrir mig að komast inn eftir að hafa endað í öðru sæti á St. Jude meistaramótinu í Memphis og ég hlakka til að takast á við þetta verkefni," sagði

Karlsson sem er í 16. sæti heimslistans og hefur á undanförnum árum búið í Monte Carlo. Karlsson hefur sigrað á 11 mótum á Evrópumótaröðinni. Hann hefur titil að verja á Katar meistaramótinu sem hefst á fimmtudaginn á Evrópumótaröðinni en þar verður Tiger Woods á meðal keppenda. Karlsson ætlar að leika á 15 mótum á PGA mótaröðinni og 12-13 mótum á Evrópumótaröðinni og það verður því nóg að gera hjá honum á þessu ári.

Nokkrir af bestu kylfingum heims ákváðu í haust að vera ekki fullgildir meðlimir á PGA mótaröðinni og þar má nefna Rory McIlroy frá Norður-Írlandi, Lee Westwood frá Englandi og Þjóðverjann Martin Kaymer. Westwood er efstur á heimslistanum, Kaymer er í öðru sæti og McIlroy er í áttunda sæti.

Norður-Írinn Graeme McDowell sem sigraði á opna bandaríska meistaramótinu ætlar að leggja áherslu á PGA mótaröðina á þessu ári en hann er í 5. sæti heimslistans. Sömu sögu er að segja af Suður-Afríkumanninum Louis Oosthuizen sem sigraði á opna breska meistaramótinu og landi hans Charl Schwartzel ætlar einnig að leggja áherslu á bandarísku mótaröðina.