Kubica ekki tilbúiinn að keppa í Formúlu 1 í upphafi næsta tímabils

Robert Kubica tilkynnti Formúlu 1 liði Renault í dag, að þrátt fyrir að hann sé í öflugri endurhæfingu, þá sé oft snemmt fyrir að hann skuldbinda sig til að keppa í Formúlu 1 í upphafi næsta keppnistímabils. Kubica meiddist í rallkeppni s.l. vetur og gat ekki keppt með Renault á þessu keppnistímabili og liðið hefur beðið eftir fréttum af Kubica vegna næsta árs. Kubica telur sig þurfa lengri tíma til að ná fullri heilsu.

Í fréttatilkynningu frá Renault segir liðið muni skoða hvaða ökumenn komi til greina í stað Kubica og að liðið muni hjálpa honum eins og kostur er hvað endurhæfinguna varðar. Þá bíði hans prufubíll og starfslið til að sinna prófun með honum. Kubica verður áfram hluti af Renault liðinu á næsta ári samkvæmt fréttatilkynningunni og segir að liðið sé í viðræðum við umboðsaðila hans um að framlengja samning hans, þannig að hann verði hjá liðinu árið 2013.

„Jafnvel þó ég hafi lagt mjög hart að mér síðustu vikurnar, þá hef ég komist að þeirri niðurstöðu að ég er ekki ennþá viss um að ég verði tilbúinn fyrir upphaf 2012 keppnistímabilsins. Ég hef haft samband við liðið og látið þá vita stöðuna. Þetta var erfið ákvörðun, en sú skynasamlegasta," sagði Kubica um málið í tilkynningunni frá Renault.

Kubica sagðist vita að Renault þyrfti að undirbúa næsta keppnistímabil og það hefði ekki verið rétt að framlengja frest hvað ákvarðantöku varðaði í málinu. Kubica sagði endurhæfinguna ganga vel.

„Ég þarf bara meiri tíma, þar sem ég vill vera 100% tilbúinn til að skuldbinda mig í nokkuð sem viðkemur akstri. Þá þykir mér leitt að hafa ekki getað upplýst meira um stöðuna, né að hafa verið í fjölmiðlum og vill þakka vinum mínum í fjömiðlaheiminum fyrir skilning á því. Þetta var besta leiðin fyrir mig til að ráða við erfiðasta tímabilið í lífi mínu", sagði Kubica.

Eric Boullier yfirmaður Renault liðsins sagði ákvörðun Kubica vonbrigði, en að hann hefði tekið þroskaða ákvörðun með hag liðsins í huga. Liðið myndi nú byrja viðræður við nokkra ökumenn til að ákveða endanlega hvaða ökumenn aki með liðinu á næsta ári. Boullier sagði að Kubica muni taka eitt skref í einu og hann myndi stökkva um borð í keppnisbílinn sinn þegar honum finnist rétti tíminn til.