Nokkrar lokatölur og orð um aflabrest í hafbeitinni

Karl Lúðvíksson skrifar 26. september 2011 08:59

Nú eru lokatölur komnar úr nokkrum ánum og veiði að ljúka í laxánum nema Rangánum og Vatnsá. Sumarið er líklega það fjórða eða fimmta besta frá upphafi mælinga svo að veiðimenn mega vel við una.

En það er óhjákvæmilegt að staldra aðeins við nokkrar árnar og skoða mun á milli ára. Í Ytri Rangá hafa heimtur úr hafi greinilega klikkað mikið, því samkvæmt upplýsingum okkar er um 500.000 seiðum sleppt á hverju ári. 2-3% heimtur er eitthvað sem ætti að sjást en í þessum samanburði núna eru heimtur rétt um 1%, þ.e.a.s. ef áin fer í 5000 laxa. Eystri Rangá lækkar líka en þar er sleppt nokkuð minna af seiðum svo heimturnar eru hærri í henni.

Það er klárt að skilyrðin í hafinu hafa verið einhverjum stofnum í ánum óhagstæð en munurinn á milli ánna er oft ótrúlegur. Norðurá, Selá, Langá eru svipaðar og í fyrra. Þverá, Miðfjarðará, Blanda og Haffjarðará nokkuð undir en engu að síður með frábæra veiði. Menn spyrja sig því að því af hverju ár eins og Ytri Rangá, Tungufljót í Biskupstungum og Vatnsá sem eru líka byggðar upp á sleppingum hrapa svona á milli ára. Ytri hefur farið úr ca 14.000 árið 2008 var með um 10.000 laxa 2009, 6200 laxa í fyrra og núna nær hún líklega rétt 5000 löxum. Tungufljót í Biskupstungum átti fljúgandi byrjun þegar sleppingar hófust í hana í einhverju magni en sumarið núna búið að vera afspyrnu lélegt. Vatnsá fer úr 1000 löxum í rétt rúma 100.

Það er nokkuð víst að þetta þarf að skoða í því samhengi hvort verið sé að sleppa of miklu magni seiða, eru þau búin að smolta þegar þeim er sleppt, eru seiðin nógu góð? Það hlýtur að vera samhangandi þáttur skilyrða í hafi og atriða er varða sleppingarnar sjálfar. Það hlýtur að koma fram einhver viðhlýtandi skýring á þessu fljótlega.

Hér er annars listinn yfir stöðuna í ánum:

Veiðivatn	Dagsetning	Heildarveiði	Stangafjöldi	Lokatölur 2010
Ytri-Rangá & Hólsá, vesturbakki.	21. 9. 2011	4388	24	6210
Eystri-Rangá	21. 9. 2011	4140	18	6280
Miðfjarðará	21. 9. 2011	2290	10	4043
Norðurá	14. 9. 2011	Lokatölur 2134	15	2279
Blanda	21. 9. 2011	Lokatölur 2032	16	2777
Selá í Vopnafirði	21. 9. 2011	2016	8	2065
Langá	21. 9. 2011	1912	12	2235
Þverá + Kjarará	21. 9. 2011	Lokatölur 1825	14	3760
Haffjarðará	21. 9. 2011	Lokatölur 1526	6	1978
Breiðdalsá	21. 9. 2011	1385	8	1178