Tungufljótið að lifna við

Svo virðist sem að líf sé að glæðast í Tungufljóti í Biskupstungum. Í gær komu 8 laxar á land á 4 stangir og skiptist þannig að allir veiðimenn fengu lax.

Fljótið hefur verið með rólegasta móti í sumar, en sterkasti tíminn hefur jafnan verið seinnihluti ágústmánaðar og september allur. Þó það sé e.t.v. orðið útséð með að sumarið í sumar verði seint metsumar í fljótinu þá má þó gera sér vonir um að sá tími sem eftir er verði góður – enda besti tíminn í gegnum árin.

Í fyrra voru nokkrir félagar okkar á Veiðivísi staddir í ánni í byrjun september og þá ruddist torfa af laxi upp stigann við Faxa og upp á efri svæðin.  Svo mikil var gangann að tugir laxa voru að stökkva framhjá stiganum og lentu í mölinni við hliðina á honum.  Þessir ágætu veiðimenn tóku því til sinna ráða og voru í því að taka upp lax sem hafði stokkið út fyrir og setja hann aftur í stigann.  Þetta stóð yfir í um klukkutíma og þá var gangann kominn öll í gegn.