Bréf í Apple hrynja eftir brotthvarf Jobs úr forstjórastóli

Steve Jobs er hættur sem forstjóri Apple tölvurisans og hrundu bréf fyrirtækisins í utanmarkaðsviðskiptum á Wall Street í gærkvöldi.

Sölustjóri Apple, Tim Cook, mun taka við forstjórastarfinu en Jobs mun áfram starfa sem stjórnarformaður. Engin ástæða var gefin fyrir afsögn Jobs en vitað er að hann hefur glímt við krabbamein á undanförnum árum og hefur verið í veikindaleyfi síðan í janúar á þessu ári.

Ferill Jobs er ævintýri líkastur en honum hefur tekist að byggja Apple upp í að vera annað verðmætasta fyrirtækið á bandaríska hlutabréfamarkaðnum. Hann fékk snemma áhuga á tölvum og stofnaði Apple fyrirtækið í bílskúrnum heima hjá sér aðeins 19 ára gamall ásamt Steve Wozniak árið 1976.

Þeir yfirgáfu báðir fyrirtækið á níunda áratugnum en Jobs tók aftur við forstjórastöðu Apple 1996 og síðan hefur uppgangur fyrirtækisins verið með ólíkindum. Tæki eins og iMac, iPod, iPhone og iPad sem Steve stóð fyrir þróun og uppbyggingu hafa skilað fyrirtækinu methagnaði ár eftir ár og hafa því fjárfestar óttast hvaða áhrif fráhvarf hans mun hafa á fyrirtækið en hlutir í Apple féllu um sjö prósent í eftirmarkaðsviðskiptum vestanhafs eftir að tilkynningin barst í gærkvöldi.