Ólafur Már: Kylfusveinninn var bara í súkkulaðinu

Ólafur Már Sigurðsson spilaði holurnar átján á einu höggi undir pari. Hann var eldhress þegar blaðamaður hitti á hann og kannaðist ekkert við að hafa súkkulaði í sínum fórum.

„Ég er nokkuð ánægður með þetta. Fór rólega af stað en spilaði nokkuð vel síðustu holurnar. Hefði ekki getað verið betra."

Ólafur Már hefur verið iðinn við golfkennslu undanfarin ár en kannast ekkert við að það sé meiri pressa á kennaranum sem allt á að kunna.

„Nei, nei. Ég held að það sé nú ekki. Ég hef verið að reyna að spila meira undanfarið en síðustu fjögur fimm árin. Ég hef nánast bara verið að kenna allan daginn."

Blaðamaður forvitnaðist aðeins um hvernig kylfingar ættu að næra sig á golfhringnum.

„Maður verður að borða vel. Drekka nóg sérstaklega ef það er heitt. Borða ávexti og samlokur. Verða aldrei svangur. Borða jafnt og þétt."

Ólafur Már kannaðist ekkert við að vera með súkkulaði í golfpokanum sínum.

„Nei, nokkrir bananar og epli. Kylfusveinninn var bara í súkkulaðinu," sagði Ólafur Már og hló.