Páll Magnússon biður golfáhugamenn afsökunar

Páll Magnússon útvarpsstjóri og Haukur Örn Birgisson varaforseti Golfsambands Íslands voru í spjalli hjá Heimi og Kollu Í Bítinu á Bylgjunni í morgun. Útvarpsstjóri svaraði því hvers vegna útsending frá Íslandsmótinu í höggleik hefði verið rofin á sunnudag og bað golfáhugamenn afsökunar.

Í máli útvarpsstjóra kom meðal annars fram að um tvo vonda kosti hefði verið að velja. Að rjúfa útsendinguna frá golfmótinu eða að fresta fréttum. Í ljósi aðstæðna úti í heimi (harmleiksins í Noregi) hafi verið tekin sú ákvörðun að flytja fréttir á fyrirhuguðum tíma.

Aðspurður um hvort ekki hefði verið hægt að flytja útsendinguna yfir á Rúv+ sagði útvarpsstjóri talsverða tæknilega örðugleika við að nota Plúsinn. Kalla þurfi bæði símafyrirtækin til og aðdraganda þurfi að því. Það taki líklega heilan dag og hefði þurft að vera búið að ákveða á laugardeginum.

Útvarpsstjóri sagði þó að gagnrýna mætti Ríkisútvarpið fyrir að hafa ekki haft þá viðbragðsflýti að flytja útsendinguna yfir á netið. Þau myndu læra af þeirri reynslu.

Stjórnandi þáttarins, Heimir Karlsson, sagðist hafa tekið eftir því að áhorfendur hefðu ekki verið beðnir velvirðingar á því að útsendingin yrði rofin. Slíkt væri algengt þegar fréttir væru færðar til vegna viðburða í beinni útsendingu.

Útvarpsstjóri sagði að hefði svo verið væri það klaufalegt.

„Það er betra seint en aldrei að biðjast velvirðingar á því nú," sagði Páll við góðar undirtektir þáttastjórnenda.

Hlusta má á viðtalið í heild sinni í spilaranum hér að ofan.