Mjög gott í Straumunum og Norðurá

Síðasta tveggja daga holl í Straumunum fékk 37 laxa á tvær stangir. Þeir sem tóku við létu sitt ekki eftir liggja og voru komnir með sextán laxa í morgun.

Þetta eru jákvæðar fréttir fyrir árnar í Borgarfirðinum, sér í lagi Norðurá þar sem að góð veiði hefur verið að undanförnu. Þar var holl fyrir skemmstu sem fékk 132 laxa og gáfu sex dagarnir nálega 240 laxa. Hollið sem nú er við veiðar er komið með rúmlega 90 laxa eftir tveggja daga veiði.

Að sögn Jóns G Baldvinssonar lítur út fyrir að göngur séu einfaldlega seinna á ferðinni þetta árið.  Sem dæmi þá kraumaði Stekkjarfljótið í morgun og var sett þar í ellefu laxa. Á þessum tíma í fyrra þá var botninn að detta úr göngunum og gekk lítið af fiski eftir 15. júlí. Nú eru göngur hins vegar að færast í aukana og stefnir í það að Norðurá rjúfi 1000 laxa múrinn á næstu tvo sólarhringa.

Birt með góðfúslegu leyfi SVFR