Mickelson hefur fimm sinnum endað í öðru sæti

Phil Mickelson hefur aldrei náð að sigra á opna bandaríska meistaramótinu í golfi en hann hefur keppt alls 20 sinnum á þessu móti og mótið í ár er því það 21 sem hann leikur á. Mickelson segir að hann hafi látið sig dreyma um að sigra á þessu móti frá því hann var barn en hann er enn ekki hættur að láta sig dreyma þrátt fyrir að vera 41 árs gamall.

Mickelson hefur fimm sinnum endað í öðru sæti á opna bandaríska meistaramótinu en hann hefur sigrað þrívegis á Mastersmótinu og einu sinni á PGA –meistaramótinu.

Fyrir fimm árum var Mickelson ansi nálægt því að sigra á US Open sem fram fór á Winget Foot vellinum. Þar var hann í harðri baráttu um sigurinn gegn Skotanum Colin Montgomerie en þeir gerðu sig báðir seka um mistök á lokakaflanum og Ástralinn Geoff Ogilvy stóð uppi sem sigurvegari. Mickelson hefur eins og áður segir endað fimm sinnum í öðru sæti á þessu móti og hann á því slæmar minningar frá lokadeginum á þeim öllum.

Payne Stewart hafði betur gegn Mickelson árið 1999 með pútti á lokaholunni, árið 2002 sigraði Tiger Woods með þriggja högga mun og árið 2004 fékk Mickelson skramba á 17. á lokadeginum og Retief Goosen frá Suður-Afríku stóð uppi sem sigurvegari.