Luke Donald tryggði sér sigur og efsta sætið á heimslistanum

Enski kylfingurinn Luke Donald tyllti sér í efsta sæti heimslistans í golfi í fyrsta sinn á ferlinum með því að sigra á BMW meistaramótinu á Evrópumótaröðinni í gær. Donald sigraði Lee Westwood frá Englandi í bráðabana um sigurinn en Westwood var í efsta sæti heimslistans.

Fyrir sigurinn fékk Donald rúmlega 120 milljónir kr. en mótið var gríðarlega sterkt þar sem sjö af níu efstu á heimslistanum tóku þátt.

Það vakti mikla athygli að Donald var ekki valinn í úrvalslið Evrópu fyrir síðustu Ryderkeppni en hann hefur leikið frábærlega á þessu tímabili og verið á meðal 10 efstu í síðustu 9 mótum. Hann hefur unnið sér inn tæplega 600 milljónir kr. á þessu ári, eða rétt um 15 milljónir kr. fyrir hverjar 18 holur sem hann hefur leikið.

Donald er 33 ára gamall og er þetta fimmti sigur hans á Evrópumótaröðinni og alls hefur hann unnið þrjú mót á PGA mótaröðinni í Bandaríkjunum.