Axel sigraði með yfirburðum í karlaflokki á fyrsta stigamótinu

Axel Bóasson úr Keili sigraði með yfirburðum á fyrsta stigamóti ársins á Eimskipsmótaröð GSÍ í golfi. Axel lék hringina tvo á Garðavelli á Akranesi á 7 höggum undir pari samtals og var hann sjö höggum betri en Arnar Snær Hákonarson úr GR sem lék á pari samtals. Stefán Már Stefánsson úr GR, sem var efstur eftir fyrri keppnisdaginn á -5 endaði á 2 höggum yfir pari og endað hann í þriðja sæti.

Axel endaði í 10. sæti á stigalistanum á Eimskipsmótaröðinni í fyrra og er þetta fyrsti sigur hans á stigamótaröðinni. Hann varð tvívegis í þriðja sæti á síðasta tímabili. Hann lék á 69 höggum í dag við erfiðar aðstæður á Garðavelli þar sem töluverður vindur gerði kylfingum erfitt fyrir. Axel lék á 68 höggum í gær þegar veðrið var mun betra og skorið því frábært. Hann fékk m.a. örn á 13. braut vallarins sem er par 5. Alls fékk hann fjóra fugla á hringnum.

Hlynur Geir Hjartarson úr GOS hefur titil að verja á Eimskipsmótaröðinni en hann endaði í 7. sæti á fyrsta mótinu ásamt tveimur öðrum kylfingum.

Lokastaðan hjá efstu mönnum:

1. Axel Bóasson, GK,- 7

2. Arnar Snær Hákonarson, GR, par

3. Stefán Már Stefánsson, GR, +2

4. Helgi Birkir Þórisson, GSE, +3

4. Örvar Samúelsson, GA +3

6. Haraldur Franklín Magnús, GR, +5

7. Hlynur Geir Hjartarson, GOS, +6

7. Sigmundur Einar Másson, GKG, +6

7. Sigurjón Arnarsson, GR, +6

10. Örn Ævar Hjartarson, GS, +7