Masters: Sagan segir að Luke Donald eigi ekki möguleika

Enski kylfingurinn Luke Donald þarf að skrifa nýjan kafla í sögu Mastersmótsins í golfi ef hann ætlar sér að sigra á fyrsta stórmóti ársins. Donald, sem hefur aldrei sigrað á einu af fjórum risamótum ársins, stóð uppi sem sigurvegari á par 3 holu mótinu sem ávallt er haldið degi áður en Mastersmótið hefst. Sagan er ekki með Donald þar sem að það hefur aldrei gerst að sigurvegarinn á par 3 holu mótinu hafi klætt sig í græna sigurjakkann við verðlaunaafhendinguna á lokadeginum á Augusta.

Keppendur eru ekki mikið að stressa sig yfir þessu par 3 holu móti þar sem að börn þeirra og jafnvel foreldrar eru kylfuberar. Donald, sem er í fjórða sæti heimslistans, lék holurnar 9 á 5 höggum undir pari eða 22 höggum. Jafnir í öðru sæti var sigurvegari Mastersmótsins árið 2009, Angel Cabrera frá Argentínu, og Raymond Floyd sem sigraði á Mastersmótinu árið 1976.

Donald var ánægður með sigurinn og virðist hann vera í góðu standi fyrir mótið. „Það er alltaf góð tilfinning að slá boltann nálægt holu með fleygjárnunum. Ég gerði það í dag og á þessum velli eru mörg högg mjög lík þeim sem við þurfum að slá úti á Augusta vellinum," sagði Donald en besti árangur hans á Mastersmótinu er 3. sætið árið 2005.

Þetta var í 51. sinn sem mótið fer fram en Sam Snead var sá fyrsti sem vann mótið árið 1960. Eins og áður segir hefur það aldrei gerst að sigurvegarinn á par 3 mótinu hafi staðið uppi sem sigurvegari á Mastersmótinu líka. Floyd hefur komist næst því en hann tapaði í bráðabana árið 1990 gegn Nick Faldo en Floyd sigraði á par 3 holu mótinu það sama ár.

Louis Oosthuizen frá Suður-Afríku sigraði á par 3 holu mótinu í fyrra en hann komst ekki í gegnum niðurskurðinn á Mastersmótinu 2010. Oosthuizen gerði aðeins betur á Opna breska meistaramótinu á St. Andrews í fyrra þar sem hann stóð uppi sem sigurvegari.