Hugo Lloris næsti markvörður United?

Enskir fjölmiðlar telja Hugo Lloris, markvörð franska liðsins Lyon, líklegastan til að verða næsti markvörður Manchester United. Sir Alex Ferguson er sagður hafa fylgst með Lloris um langt skeið.

Lloris býr yfir miklum hæfileikum og sýndi snilldartilþrif í rimmu Lyon gegn Bordeaux í átta liða úrslitum Meistaradeildarinnar.

Edwin van der Sar á ekki mikið eftir af sínum ferli og Ferguson er því að skima í kringum sig. Manuel Neuer hjá Schalke, Igor Akinfeev hjá CSKA Moskvu og David de Gea hjá Atletico Madrid eru einnig taldir vera á lista hjá Ferguson.

Annars er það að frétta af Manchester United að Leonardo Bonucci, varnarmaður Bari, er einnig orðaður við liðið. Þessi 22 ára leikmaður hefur vakið mikla athygli fyrir frammistöðu sína í Seríu-A í vetur.