Evran aftur að lækka gangvart dollaranum

Greining Íslandsbanka fjallar um málið í Morgunkorni sínu. Þar segir að evran gaf enn eftir gagnvart Bandaríkjadal í morgun og kostar þegar þetta er ritað (11:25) 1.355 dal. Það sem að helst veikir evruna eru áhyggjur af Grikklandi. Grannt er nú fylgst með hvort grískum stjórnvöldum takist að tryggja sér aðstoð frá félögum sínum í Evrópusambandinu en leiðtogar sambandsins hittast í næstu viku til að ræða m.a. málefni Grikklands.

Grikkland hefur verið allsráðandi í hreyfingum á evru/dollar gengiskrossinum undanfarna mánuði en evran lækkaði um 10% gagnvart Bandaríkjadollar frá desemberbyrjun til febrúarloka. Í marsbyrjun varð viðsnúningur sem hefur á síðustu dögum gengið allur til baka.

Útlit er fyrir að evran muni eiga undir högg að sækja á meðan málefni Grikklands eru óleyst en eins og kunnugt er hefur nú komið til tals að evruríkið leiti á náðir Alþjóðagjaldeyrissjóðsins. Búast má við að málin skýrist í næstu viku en þangað til þá má búast við að evran verði undir talsverðum þrýstingi.