Kristinn dæmir seinni leik Werder Bremen og Twente

Milliríkjadómarinn Kristinn Jakobsson hefur fengið verðugt verkefni í Evrópudeild UEFA en hann mun dæma seinni leik Werder Bremen og Twente sem fram fer í Þýskalandi á fimmtudaginn.

Twente vann fyrri leik liðanna í Hollandi fremur óvænt 1-0 og því ríkir mikil spenna og eftirvænting fyrir seinni leiknum og ljóst að Kristinn mun hafa í nógu að snúast enda mikið í húfi fyrir bæði lið.

Kristni til aðstoðar verða þeir Sigurður Óli Þórleifsson og Ólafur Ingvar Guðfinnsson og fjórði dómari verður Jóhannes Valgeirsson.

Þá verður líkt og áður hjá Kristni og félögum í Evrópudeildinni einnig boðið upp á auka aðstoðardómara en það verða þeir Magnús Þórisson og Þorvaldur Árnason, sem verða staðsettir fyrir aftan sitt hvort markið.