Húfa úr Trúði gæti gefið 180 milljónir af sér

Dönsk stjórnvöld gáfu nýlega sjónvarpsstöðvum leyfi til þess að nota svokallaða vöruísetningu (e. product placement) í kvikmyndum og sjónvarpsþáttum. Vöruísetning er nokkurskonar falin auglýsing, þar sem vörumerki er sett á einhvern hlut sem er áberandi í mynd.

Sjónvarpsstöðin TV 2 er þessa dagana að skoða hvernig hægt sé að nýta sér þetta leyfi til þess að auka tekjur sjónvarpsstöðvarinnar og hve mikið sé hægt að auka tekjur á næsta ári.

Það er von á nokkrum ábata fyrir TV 2. Ráðgjafafyrirtækið Initiative Universal Media telur að sjónvarpsstöðin ætti að geta fengið um 9 milljónir danskra króna á hverju ári fyrir merkið á húfu Franks Hvam í danska sjónvarpsþættinum Trúður. Upphæðin nemur um 180 milljónum íslenskra króna. Þá ættu um 700 þúsund danskar krónur að fást fyrir merki á flatskjá sem er nokkuð áberandi í veðurfréttatímanum.

Søndagsavisen segir að framleiðendur og innflytjendur séu áhugasamir um þessa nýjung í markaðssetningu í Danmörku. Til dæmis hafi bæði Carlsberg bjórverksmiðjurnar og Toyota umboðið sagt að þessi möguleiki væri spennandi.