Aðvörun: Bankavírusinn Zeus aftur í umferð

Öryggisþjónustan Trusteer segir að Zeus sé nú að finna í einni af hverjum 3.000 tölvum af þeim 5,5 milljón tölvum sem þjónustan hefur eftirlit með í Bandaríkjunum og Bretlandi. Zeus sýkir einkum tölvur þar sem Firefox og Internet Explorer eru til staðar.

Zeus virkar þannig að vírusinn skráir áslátt á lyklaborð tölvunnar þegar notandi hennar er á ákveðnum síðum þ.e. í sambandi við banka sinn eða aðrar fjármálastofnanir. Síðan sendir vírusinn þær upplýsingar til stjórnenda sinna sem selja þær áfram til tölvuþrjóta.

Fram kemur á BBC að tekist hefði að stöðva Zues í síðasta mánuði. Það var gert með því að rekja vírusinn til stjórnenda sinna sem höfðu hýst hann í netþjónabúi í Kazakhistan. Þar tókst að eyðileggja stjórnkerfið fyrir Zeus.

Nú er ný og öflugri útgáfa af Zeus tekin að herja á netinu. Amit Klein tæknistjóri Trusteer segir að reikna megi með tölvusvikamálum fjölgi verulega á næstunni. „Nálægt 30% þeirra sem stunda bankaviðskipti á netinu gera það í gegnum Firefox og sýkingin þar breiðist hraðar út en við höfum nokkurn tíma séð áður," segir Klein.