Real Madrid rauf draumamúrinn hvað veltu varðar

Þetta kemur fram í árlegri skýrslu Deloitte undir heitinu Football Money League. Real Madrid jók veltu sína milli keppnistímabila um 10% og fór hún í 401 milljón evra þrástt fyrir að árangur liðsins þetta ár bæði á heimavelli og í Evrópu væri ekkert til að hrópa húrra fyrir.

Barcelona erkifjendur Real Madrid náði mestri aukningu á veltu félagsliða en hún jókst um 57 milljónir evra og fór í 366 milljónir evra. Þar með velti Barcelona enska liðinu Manchester United úr öðru sæti peningalistans.

Bresk lið eins og Manchester United falla niður peningalistans vegna veikingar breska pundsins. Þannig kemur fram að ef pundið hefði verið jafnsterkt og það var árið 2007 hefði Manchester United náð fyrsta sætinu af Real Madrid á síðasta keppnistímabili.

Velta Manchester United nam 327 milljónum evra og náði liðið þriðja sætinu á peningalistanum.Í fjórða sæti kemur svo Bayern Munich með 290 milljónir evra. Næstu sætin þar fyrir neðan skipa svo Arsenal, Chelsea og Liverpool.