Hreiðar: Ánægður með minn leik

Hreiðar Levý Guðmundsson markvörður átti magnaða innkomu í íslenska liðið í kvöld. Hann kom af bekknum í erfiðri stöðu og varði eins og berserkur.

"Ég er nokkuð sáttur við minn leik í dag. Eigum við ekki að segja svona 80 prósent sáttur," sagði Hreiðar hógvær eftir leikinn.

"Þetta gekk fínt og ég er ánægður með sjálfan mig. Ég varði talsvert úr erfiðum færum. Þetta var samt skelfilegur leikur hjá okkur. Það er ekkert hægt að fegra það," bætti markvörðurinn við.

"Það er eins og menn hafi ekki verið rétt gíraðir fyrir slaginn. Við vorum frekar kærulausir. Við lendum ekki 1-5 undir gegn Lettlandi á heimavelli nema það sé vanmat í gangi."