Birgir Leifur: Fæ með þessu rosalega gott sjálftraust fyrir framhaldið

„Þetta var gríðarlega spennandi og ljúft að sigra," sagði Birgir Leifur Hafþórsson eftir að Íslandsmeistaratitilinn var í höfn en hann var þá í viðtali við Pál Ketilsson í beinni útsendingu sjónvarpsins frá Íslandsmótinu í höggleik sem fram fór í Kiðjaberginu og lauk í kvöld.

„Það var sárt að sjá þá klúðra meira en ég hélt mínu striki og var að spila rosalega vel í vindunum. Því for sem fór ég náði að halda mínu en það var leitt að sjá þá klúðra sínu," sagði Birgir Leifur um þróun mála á 12. til 14. holu þegar hann stakk keppninauta sína af.

„Þetta er rosalega gott sjálftraust fyrir það að fara aftur í atvinnumennskuna og það er gaman að koma til baka og byrja svona vel. Ég var að finna mig vel og var að slá góð högg við erfiðar aðstæður," sagði Birgir Leifur.

„Spilamennskan mín í mótinu var upp og ofan en hún jafnaðist alltaf út. Það voru góð högg en jafnframt góð pútt og léleg pútt. Þetta var þannig völlur að maður þurfti að sýna þolinmæði og reyna að halda sig inn á vellinum og það tókst allt að lokum," sagði Birgir Leifur sem vann mótið með þriggja högga mun.