Engin haldbær sönnunargögn önnur en játning

Engin haldbær óumdeild sönnunargögn virðast liggja fyrir í manndrapsmálinu í Hafnarfirði, sem lögregla er tilbúin að greina frá, önnur en játning Gunnars Rúnars Sigurþórssonar. Leit lögreglu að morðvopninu hefur engan árangur borið.

Leit að morðvopninu sem Gunnar Rúnar Sigurþórsson notaði til að bana Hannesi Þór Helgasyni hófst aftur upp úr hádeginu og voru kafarar frá sérsveit ríkislögreglustjóra að fínkemba svæðið við smábátahöfnina í Hafnarfirði í allan dag. Laust fyrir sex í kvöld var morðvopnið ekki enn fundið. Gunnar Rúnar hefur samþykkt að sæta geðheilbrigðisrannsókn og verður hún framkvæmd eftir helgi.

Friðrik Smári Björgvinsson sagði í samtali við fréttastofu í dag að það væri ekki úrslitaatriði að morðvopnið fyndist þar sem játning lægi fyrir, hins vegar skipti það máli að morðvopnið kæmi í leitirnar upp á sönnun að gera enda vill lögreglan búa málið sem best undir ákærumeðferð hjá ríkissaksóknara. Lögregla neitar að sú afstaða að útiloka hlutdeild annarra byggist á játningu Gunnars Rúnars eingöngu og segir að það komi fleira til, en ekki hefur fengist upp gefið hvað það er.

Fréttastofa fékk staðfest í dag að meðal þess sem komið hefði fram við yfirheyrslur yfir Gunnari Rúnari var að uppáhaldskvikmynd hans væri V For Vendetta með bandarísku leikkonunni Natalie Portman, en hún fjallar um hnífaárásir. Þá er bókin Dauðarósir eftir Arnald Indriðason í miklu uppáhaldi hjá sakborningnum, en bókin fjallar að hluta til um ástríðuglæpi en ein af söguhetjum bókarinnar er ungur maður sem hefur verið utangátta í samfélaginu, var lagður í einelti og skilinn útundan. Eftir því sem fréttastofa kemst næst hefur þetta takmarkaða þýðingu fyrir rannsóknina, en kom engu að síður fram við bakgrunnsathugun á sakborningnum. Friðrik Smári vildi ekki tjá sig um þetta atriði í samtali við fréttastofu.

Það liggja ekki enn fyrir niðurstöður úr DNA-rannsókn á blóði sem fannst á skóm Gunnars Rúnars, en enn er beðið eftir niðurstöðum úr nokkrum rannsóknum frá Svíþjóð. Það hefur ekkert breyst þar. Á blaðamannafundinum í gær vék Friðrik Smári Björgvinsson að þessu atriði með svofelldum orðum: „Þau sýni og þær niðurstöður hafa ekki varpað neitt skýrara ljósi á málið. Við erum ekki búnir að fá niðurstöður úr öllum þessum sýnum sem send voru út."

Lögreglan veit hvernig hnífur var notaður en vill ekki svara spurningum um hvort um hefðbundið eldhúsáhald hafi verið að ræða eða annars konar eggvopn. Gunnar Rúnar var ekki samvinnuþýður við rannsóknina fram að játningu, samkvæmt heimildum fréttastofu, enda neitaði hann ávallt að hafa átt aðild að verknaðinum í fyrstu. Hátt í hundrað manns hafa verið yfirheyrðir vegna málsins og hafa um það bil fjörutíu lögreglumenn komið að rannsókninni. Lögregla svarar engu um undirbúningsathafnir af hálfu sakborningsins og hefur svarað því þannig að frekari rannsóknir muni leiða það í ljós. Þannig að ekki liggur fyrir hvort sakborningurinn hafi haft einbeittan ásetning í einhvern tíma um að verða hinum látna að bana. Málið verður sent til ákærumeðferðar hjá Valtý Sigurðssyni, ríkissaksóknara, um leið og rannsókn þess lýkur.