Nedved staðfesti endalok ferils - Notts County reyndi að fá hann

Tékkinn Pavel Nedved staðfesti í gær að fótboltaskórnir yrðu áfram á hillunni en hinn 36 ára gamli miðjumaður hætti sem kunnugt er hjá Juventus eftir síðasta keppnistímabil á Ítalíu.

Nedved hafði ástæðu til þess að ítreka það að hann væri hættur því tilboðunum hefur ringt yfir hann frá því hann tilkynnti fyrst að ferli sínum væri lokið.

Fyrir utan tilraunir Juventus um að sannfæra leikmanninn um að halda áfram hjá félaginu sem leikmaður eða þjálfari þá var hann sterklega orðaður við félög bæði í Bandaríkjunum og í Sameinuðu arabísku furstadæmunum.

Þá hefur Sven Goran Eriksson, nýráðinn yfirmaður knattspyrnumála hjá enska d-deildarfélaginu Notts County, nú staðfest að hafa reynt að sannfæra leikmanninn um að koma til félagsins en Nedved spilaði á sínum tíma fyrir Eriksson hjá Lazio.