Krasic neitar því að vera á leiðinni til AC Milan

„Þetta eru bara sögusagnir í dagblöðum. Ég er ekki nálægt því að ganga í raðir AC Milan og það er ekki búið að ganga frá neinu fyrir félagaskiptagluggan í janúar.

Það má vel vera að AC Milan hafi spurst fyrir um mig en málin komust aldrei lengra en það," segir miðjumaðurinn Milos Krasic hjá CSKA Moskvu í viðtali við rússneska dagblaðið Novosti.

Hinn 24 ára gamli Serbi, sem var sterklega orðaður við félagaskipti frá rússneska félaginu í sumar, útilokar þó ekki að yfirgefa CSKA Moskvu ef stórt félag á borð við AC Milan komi kallandi.

„Ég er búinn að vera hjá CSKA Moskva í fimm ár og væri alveg til í að breyta um umhverfi ef stórt félag vill fá mig. Ég held líka að CSKA Moskva myndi ekki standa í vegi fyrir mér," segir Krasic.