Sigur Ferrari afmælisgjöf til forsetans

Stefano Domenicali, framkvæmdarstjóri Ferrari var að vonum ánægður með fyrsta sigur Ferrari á árinu og hann segir ekkert ákveðið með framtíð Kimi Raikkönen eða Fernando Alonso hjá liðinu.

"Það var sætt að sigra eftir svo erfitt tímabil og það sem henti Felipe Massa fyrir mánuði síðan. Hann fylgdist með keppninni og fer í læknisskoðun í dag. Ég er virkilega ánægður með Raikkönen sem vann, þrátt fyrir alla umræðu fjölmiðla um að hann sé að hætta hjá Ferrari. Það er ekkert hæft í því eða annarri umfjöllum um ökumenn okkar", sagði Domenicali.

Mikið hefur verið rætt um að Giancarlo Fisichella taki sæti Luca Badoer í næstu keppni og svör Fisichella hafa vissulega verið loðinn, en Domenicali svarar líka fáu um málið. Þá segir hann af og frá að Fernando Alonso keyri fyrir liðið í næstu mótum.

"Sigurinn var góð afmælisgjöf fyrir forseta Ferrari sem á afmæli í dag og fyrir alla þá sem vinna með Ferrari. Þá hafa áhangendur okkar þjáðst með okkur og sigurinn var því mikilvægur öllum. Okkur hefur gengið vel í undanförnum mótum, en tæknilega séð er vandasamt að skilja hvað er í gangi. Við höfum fryst framþróun bílsins, en vinnum samt. Raikkönen ók eins og andskotinn væri á eftir honum og sneri á Fisichella á mikilvægu augnabliki. Það skóp sigurinn", sagði Domenicali.

Ferrari mun ákveða á næstu dögum hvort Badoer ekur áfram hjá Ferrari, en hann hefur lent í neðsta sæti í báðum mótunum sem hann hefur ekið með Ferrari síðan Massa meiddist. Massa fer í lælknisskoðun hjá þekktum lækni í Miami í dag og fær úr því skorið hvenær hann má keppa.

Sjá stigagjöfina í mótum ársins